Ang Pagpili og Sponsor

Pag-download/Tan-awa: PDF

Ang pakigtambayayong sa usa ka sponsor makatabang kanimo aron maulian. Ang usa ka sponsor makasuporta kanimo sa imong pag-uswag ug determinasyon aron sa pagbuntog sa mga hagit, mga pagkagumon, o makaadik nga mga buhat nga imong giatubang. Sa imong panaw sa pagkaulian, wala ka mag-inusara; ang mag sponsor nga tawo kinsa mahimong “andam nga … [mo]hupay niadto nga nagkinahanglan sa kahupayan, ug mobar[o]g nga mga saksi” (Mosiah 18:9). Palihog ikonsiderar ang pakigtambayayong sa usa ka sponsor sa labing dali nga panahon. 

UNSA ANG USA KA SPONSOR? 

Ang sponsor usa ka tawo kinsa nakakaplag sa pagkaulian pinaagi sa pagbuhat sa 12 ka lakang. Sila mahimong makasabot sa piho nga mga hagit nga may kalabotan sa pagkaulian bisan kon wala ka mahibalo niini. Ang usa ka sponsor anaa aron matabangan ka nga mapahimutang ang imong “[kinabuhi] ngadto sa hustong panglantaw ug malikay sa pagpasulabi o pagpagamay sa [imong] pagkamaytulubagon” (Giya aron Maayo ug Maulian Gikan sa Pagkaadik, 29). Ang usa ka sponsor wala gitumong aron mahimong imong labing suod nga higala o propesyonal sa kahimsog sa pangisip. Ang tahas sa usa ka sponsor mao ang pagtabang kanimo sa pagbuhat sa mga lakang sa pagkaulian. 

PAGPANGITA OG USA KA SPONSOR 

Diha sa Programa sa Simbahan aron Maulian gikan sa Pagkaadik, ikaw dili hatagan og usa ka piho nga sponsor. Ang matag miyembro mahimong motan-aw sa pag-sponsor sa paagi nga mohaom sa iyang indibidwal nga kasinatian, mga panginahanglan, ug personalidad. Ang pag-sponsor usa ka hiniusa nga desisyon nimo, sa sponsor, ug sa Ginoo. 

Ang pagkaplag og usa ka tawo nga mo-sponsor nimo mahimong malisod, apan ang uban makatabang kanimo. Ang labing maayo nga paagi sa pagpangita og sponsor mao ang pagtambong sa mga miting sa pagkaulian. Kadtong adunay susama nga mga hagit sa kasagaran adunay mas dako nga abilidad sa pagsabot sa imong nga panglimbasog. Ang mosunod nga mga ideya makatabang sa paghukom og usa ka tukma nga sponsor: 

1. Pagtinguha og espirituwal nga giya gikan sa Langitnong Amahan pinaagi sa pag-ampo ug pagpuasa bahin sa kinsa ang mahimong sponsor alang kanimo.

2. Ikonsiderar ang pagpili og usa ka tawo kinsa nakagahin og dakong oras sa pagkaulian ug nakabuhat sa 12 ka lakang.

3. Paminaw samtang ang mga tawo mopakigbahin sa ilang mga kasinatian sa pagkaulian ug ikonsiderar kinsa ang mahimo nimong ikakonektar.

4. Ang mga Lider ug mga Facilitator sa Grupo mahimo nga mopaila kanimo ngadto sa tukma ug andam nga mga kandidato.

5. Hangyoa ang usa ka tawo nga imong gibati nga kwalipikado.

6. Kinahanglan nga mopili ka og usa ka sponsor nga sama ang sekso (kon dili nimo kaliwat).

7. Samtang ikaw magsugod sa proseso sa pagbag-o, posible ka nga mahuyang sa pisikal, emosyonal, ug sa espirituwal nga paagi. Pagmatngon nga dili ka makapalambo og nagsalig nga relasyon sa usa ka sponsor.

8. Makahimo ra ka nga mohangyo sa usa ka tawo nga mahimo nimong temporaryo nga sponsor. Mahimo ra ka nga mag-ilis og mga sponsor bisan kanus-a. 

PAGKAHIMONG USA KA EPEKTIBO NGA SPONSOR

Ang pagkahimong usa ka sponsor usa ka dakong buhat sa pagserbisyo samtang ikaw mopakigbahin sa kaugalingon nga kasinatian, hugot nga pagtuo ug paglaom nga imong nakaplagan samtang nagbuhat sa 12 ka lakang ngadto sa pagkaulian ug pagkaayo pinaagi sa Manluluwas nga si Jesukristo. Ang mga sponsor mangutana og manggihunahunaon nga mga pangutana, magpunting ngadto sa mga kapanguhaan, mopakigbahin sa praktikal nga tabang kon unsaon pagbuhat ang mga lakang, ug modasig niadtong ilang gisponsoran sa pagtambong sa mga miting. Ang usa ka sponsor makasabot nga ang uban mahimong adunay papel sa pagkaulian sa usa ka tawo ug dili masilo kon kadtong ilang gisponsoran magtinguha sa suporta gikan sa uban o mopili nga mag-ilis og mga sponsor. Anaa sa ubos ang pipila nga mga baroganan aron mahimong epektibo nga sponsor: 

1. Unaha ang Dios sa dili pa ang tanan. Kanunay nga hinumdomi ang Dios ug tabangi kadtong imong gisponsoran nga mosalig Kaniya. Pagmatngon nga dili tugotan kadtong imong gisponsoran nga mahimong sobra ka nagsalig kanimo. Ang imong responsibilidad isip usa ka sponsor mao ang pag-awhag sa uban nga modangop ngadto sa Langitnong Amahan ug sa Manluluwas alang sa giya ug gahom. Ang imong tahas mao ang pagpaambit sa imong mga kasinatian sa hugot nga pagtuo ug paglaom aron matabangan ang tawo nga imong gisuportahan nga mobati nga gihigugma ug gisuportahan sa grasya sa Dios. 

2. Mamahimong aktibo nga partisipante sa pagkaulian. Ang usa ka sponsor nagkinahanglan nga naulian na sa dugay nga panahon sa dili pa makasponsor ni bisan kinsa (kasagaran 12 ka bulan o mas taas pa) ug aktibo nga nalambigit sa paggamit ug pagtuon sa mga baroganan sa pagkaulian. Mahimo kang mobati og dugang nga kabug-at sa imong kaugalingon nga pagkaulian kon magsugod na ka og sponsor og laing tawo. Pagmatngon nga dili mameligro ang imong kaugalingon nga pagkaulian pinaagi sa pagsponsor og lain nga tawo. Ang usa ka sponsor nagbuhat og pag-atiman sa kaugalingon ug mangayo og tabang o suporta kon gikinahanglan. 

3. Pagmapainubsanon. Ang Giya aron Maayo ug Maulian Gikan sa Pagkaadik nagpasabot nga “Sa imong pagserbisyo sa uban, ipadayon ang imong kamapainubsanon pinaagi sa pagtutok sa mga bar[o]ganan ug mga pamaagi sa ebanghelyo nga imong nakat-unan” (71). Kini sa kaulahian nag-ingon nga “walay luna sa imong bag-ong kinabuhi alang sa garbo o bisan unsang pagbati sa kahawod” (72). Isip usa ka sponsor, ang imong tahas mao ang paggamit sa imong kusog aron sa pagtanyag og suporta ug giya. 

4. Respetohi ang kabubut-on sa uban ug pagbaton og pasensiya. Ang epektibo nga pagsponsor makab-ot “sa pagdani, sa pagka-mainant[o]son, sa kalumo ug kaagh[o]p, ug sa tiunay nga paghigugma; pinaagi sa pagkamabination, ug putli nga kahibalo” (Doktrina ug mga Pakigsaad 121:41–42). Likayi ang paghatag og tambag o mosulay sa pag-ayo sa uban sa bisan unsa nga paagi. Tabangi ang uban nga mokonsiderar sa mga baroganan ug mga pamaagi ug dayon suportahan sila samtang mohimo sila og ilang kaugalingon nga mga desisyon. Respetohi ang ilang kabubut-on ug pagbaton og paglaom nga ang Ginoo motabang kanila samtang sila modangop Kaniya. Ang tawo nga imong gitabangan posibling dili pa andam nga magpadayon. Siya posible nga mobalik sa iyang dili maayo nga buhat o hinay nga mosunod sa mga baroganan ug mga pamaagi sa sinsero nga kausaban. Ang usa ka sponsor kinahanglan nga pasinsyoso sa uban samtang sila nagpanaw ngadto sa pagkaulian.

5. Moserbisyo sa walay paghinakog. Ang walay hinakog nga pagserbisyo nagkinahanglan sa paghatag nga walay paghunahuna og balos. Ang usa ka sponsor kinahanglan nga adunay dakong kapasidad sa pagsabot ug kaandam sa paggahin og oras ug kakugi niadtong ilang gisponsoran. Likayi ang pagpangita og pagdayeg, pagbati, pagkamaunungon, o uban pang emosyonal nga mga ganti gikan niadtong imong gisponsoran.

6. Tahura ang imong personal nga mga gisaad nga buhaton. Ang pagkahimong usa ka sponsor wala magpasabot nga kadtong imong gisponsoran kinahanglan nga kanunay makagamit sa imong oras ug mga kapanguhaan. Mahimo kang motakda og usa ka ehemplo bahin sa kaimportante sa mapuslanong mga kinutoban pinaagi sa pagtahod sa imong mga gisaad nga buhaton, lakip ngadto sa imong pamilya, sa Simbahan, sa imong propesyonal nga mga paningkamot, ug sa imong personal nga panahon. Hinumdomi ang tambag nga gihatag diha sa Mosiah 4:27: “Ug tan-awa ang tanan niini nga mga butang mahimo diha sa kaalam ug kahusay; kay kini dili panginahanglan nga ang usa ka tawo kinahanglan modagan nga labaw pa kay sa iyang kusog.”

7. Magmainampoon. Sa matag higayon nga ikaw mopili sa pagsponsor og usa ka tawo, tinguhaa ang giya sa Ginoo aron mahibalo kon unsa nga mga baroganan o mga buhatonon ang labing makatabang alang sa kasamtangan nga mga panginahanglan sa indibidwal. Pagmainampoon samtang mokonsiderar ka og mga paagi sa pagserbisyo, magtinguha kanunay nga magiyahan sa Espiritu.

8. Ipamatuod ang kamatuoran. Tingali bation nimo nga giaghat sa pagpakigbahin sa mga kasinatian aron magtugot sa uban nga mahibalo nga ikaw makasabot. Mahimo usab nga mopamatuod ka bahin sa Manluluwas ug sa Iyang makaayo nga gahom. Ang kamatuoran nga ang Dios usa ka Dios sa mga milagro importante (tan-awa sa Moroni 7:29). Ang pagpaambit sa imong pagpamatuod sa Iyang kalooy ug sa Iyang grasya tingali mao ang usa sa labing importante nga mga serbisyo nga imong matanyag.

9. Matngoni ang Pagkakompidensyal. Isip usa ka sponsor, aduna kay responsibilidad sa pagpanalipod sa pribasiya sa uban. Ang dili pagpaila ug pagkakompidensiyal ang mga kinauyokan nga mga baroganan diha sa pagpalig-on sa imong abilidad sa pagsponsor ug pagtabang sa uban.